Hoe gemaak as n Seilskip van ouds na n reis van etlike maande vanaf Europa kom vasmeer by die Kaapse Hawe – en daar is nie lekker Varsprodukte om in te skeep vir die res van die reis?

Plan : Stel die Boere in die Platteland in kennis hulle moet hulle se waens laai en haas na die Hawe aan de Waterkant van Kaapstad.

Probleem :  Die N2 is nog net n kronkel grondpad en Ossewaens het nie beskik oor Turbo-aanjaers. Hoe gemaak om die boodskap van die Boot in die Hawe so gou moontlik by die Produsente uit te kry?

Dis die 1700’s en die Internet met sy vertakkings van FaceBook en Twitter is slegs die droom van Wetenskapfiksie Skrywers.

Dus – Hoe gemaak?!

Maklik. Skep n reeks van kanonne – strategies geplaas op heuwels vanaf Seinheuwel in Kaapstad

image

 

kuslangs tot selfs so vêr as Swellendam ( vandag met die N2 meer as 200 km vanaf die Moederstad!).

En die kanonne bulder – die boodskap versprei en die waens is op pad!

So vat ons dan onlangs dieselfde pad om te gaan kuier by Vrinne in die symste Swellendam. Maar Kobus was nie verniet in sy vorige lewe n Geskiedenis Onnie nie –  Hy en Brenda wag ons in net anderkant die afdraai na Stormsvlei ( tussen Riviersonderend en Swellendam ) om uit te wys dat daar – langs die pad ( ongelukkig op privaat grond en bietjie versteek agter lang gras ) is een van die voormelde netwerk van Kanonne

image

Na hierdie verrassende ontdekking was dit dan ook gepas om ( soos talle Transportryers van ouds ) af te draai en n “oorbrugginkie” te gaan nuttig by die Stormsvlei Bistro ( voorheen bekend as die Stormsvlei Hotel – en soos die bekende Houwhoek Inn naby Grabouw een van die oudste Herberge op hierdie “wagen weg”)

image

 

Hendrik Swellengrebel was die eerste Suid Afrikaans gebore Goewerneur van die destydse Kaap die Goeie Hoop – en heel gepas is ons uiteidelike bestemming nl Swellendam vernoem na hom en sy Wederhelf Helena van Damme.

En benewens dat Swellendam die derde oudste Magistraatsdistrik in SA is – was dit ook een van die eerste radikale pogings om te ontsnap van die sg “Kaapse Juk” van korrupte bestuur deur die Amptenare van die VOIC ( het enigiets sederdien verander?! Ek vra maar net ).

Die Republiek van Swellendam word dus gestig in 1795 – maar is egter van korte duur en kom tot n einde met die besetting van die Kaap in 1802 deur Groot Brittanje.

Ons is weereens beïndruk hoe n pragtige plek is Swellendam – geleë aan die voet van die Langeberge

image

Binne trefafstand van Swellendam is ook Montagu – en in dié se buitewyke op die pad na Touwsrivier en net daar waar die Burgerspas sy draaipunt maak vind jy die afdraai na Protea Plaas ( na ses geslagte steeds in die Burger Familie se besit ) en waar ons uitgenooi word om n vierwiel Trekker en sleepwa te bestyg ten einde op te kruie na die hoogste punt van die Langeberge.

Maar o wee – Marinda het haar gordel ( vir dié wie ek nou verloor het : ook bekend as n belt ) by die huis vergeet. Waaraan gaan sy haar geliefde Kamera hang?

En sy soek – selfs in die Boer se Stoor : maar daar kry sy niks wat sal werk – net Baaldraad,Bloudraad en Doringdraad.

Gelukkig kom Kobus tot haar redding – hy bemerk n stuk tou wat dalk kan werk en siedaar! Nou kan  selfs die Drakensberge maar kom

image

 

Almal nou gereed?! En daar kruie ons teen die berghang uit totdat ons by die halfpadmerk al hoër is as Tafelberg!

image

Heelbo het ons n ongelooflike uitsig : Ons is op die kruin van die  Langeberge en aan die oorkant is die Waboomberge – en dit vorm vanaf Montagu tot kort duskant Touwsrivier n vallei bestaande uit die sg Keisie en die Koo

image

Die Keisie lê Montagu se kant toe, is duidelik laer en is dus blykbaar meer geskik vir druiwe ens.

n Trappie hoër is die Koo vallei – veral bekend vir steenvrugte soos Perskes, Appelkose, Appels en Pere

image

Net voordat ons egter die afdraand aandurf word ons trakteer op n glasie waarvan David Kramer ons jare gelede bewus gemaak het : Montaguuu …. Ons drink jou Muskadel!

image

( Redakteur : Marinda vertrou klaarblyklik nie die trekker se remme met die afrit !).

Daar was n paar maande terug n verwoestende brand in die omgewing en gevolglik is die berghange kaal. Die Proteas neem blykbaar ses jaar om weer te kan blom – maar die natuur is soepel en n bietjie reën sal sekerlik sorg dat die res van die veld spoedig herstel.

En dan is daar natuurlik sommige bolplante wat eintlik net blom na n brand. Noem dít nou n simbiose!

image

Die sg Brandlelie ( Cyranthus ventricosus ) het oral dapper deur die barre aarde gebeur en ons vermaak.

 

Ons sal graag weer die Trekker bestyg – veral na die veld genoegsaam herstel het. Blykbaar is Laatwinter perfek om die Proteas in hul volle glorie te aanskou.

 

NS En die BellaDonna in die Aanhef?

Lees volgende keer verder.

 

2 thoughts on “Kanonne, Trekkers en BellaDonna.

  1. Die stukkie geskiedenis oor die kanonmetode om die spreekwoordelike rooksein na die platteland uit te stuur is fassinerend! Ek het dit nie geweet nie en sal nou elke dag se buldering vanaf Seinheuwel anders beskou. Dankie Johan, dis great.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s